Na VENANCE JOHN
Nyota wa zamani wa soka wa China na kocha wa timu ya taifa ya wanaume ya nchi hiyo amehukumiwa kifungo cha miaka 20 jela kwa kosa la rushwa. Li Tie, ambaye kwa sasa ana umri wa miaka 47, ambaye alichezea klabu ya Everton ya Ligi Kuu ya Uingereza pamoja na Wayne Rooney mwanzoni mwa miaka ya 2000, ndiye jina kubwa zaidi kuangukia kwenye msako mkali dhidi ya ufisadi uliokithiri katika ligi ya soka ya kulipwa nchini China.
Licha ya maono ya kiongozi Xi Jinping ya kuigeuza China kuwa nguvu ya soka duniani, soka la kulipwa la China limegubikwa na maamuzi duni ya kifedha, rushwa iliyokita mizizi na utendakazi wa kukatisha tamaa.
Mwaka wa 2022, baada ya timu ya taifa ya wanaume ya China kushindwa katika hatua ya awali ya Kombe la Dunia la FIFA nchini Qatar, shirika la kupambana na ufisadi nchini humo lilianzisha uchunguzi wa kina kuhusu hongo na upangaji matokeo katika soka la kulipwa la China. Li alikuwa wa kwanza kati ya maafisa wa kandanda kumi na wawili walionaswa katika msako huo.
Mnamo Machi, Chen Xuyuan, mkuu wa zamani wa chama rasmi cha soka cha China, alihukumiwa kifungo cha maisha jela kwa ufisadi. Shirika la utangazaji la CCTV limeripoti kuwa siku ya leo, Li amehukumiwa kwa makosa mengi ya hongo na mahakama katika jiji la Wuhan.
Wakati wa kesi yake mwezi Machi, waendesha mashtaka walimshtaki Li kwa kupokea zaidi ya yuan milioni 50 (dola milioni 6.8) kama hongo kati ya 2019 na 2021, alipokuwa kocha mkuu wa timu ya taifa ya China. Kwa kubadilishana, alitoa upendeleo kwa wachezaji fulani kuchaguliwa katika timu ya taifa na kusaidia vilabu fulani kushinda mechi, kulingana na waendesha mashtaka.
댓글